(पीटीआई) पाकिस्तानको उत्तरपश्चिमी सहर पेशावरमा शुक्रबारको नमाजको क्रममा एउटा शिया मस्जिदमा भएको शक्तिशाली आत्मघाती बम विष्फोटमा परी कम्तीमा ५७ जनाको मृत्यु भएको छ भने करिब २०० जना घाइते भएका छन् । अफगानिस्तानसँग सीमा जोडिएको अशान्त प्रान्तमा भएको यो सबैभन्दा घातक हमला हो।
एक उद्धार अधिकारीका अनुसार किस्सा ख्वानी बजार क्षेत्रमा रहेको जामिया मस्जिदमा मानिसहरू शुक्रबारको नमाज पढिरहेका बेला विस्फोट भएको थियो।
अफगानिस्तानसँग सीमा जोडिएको खैबर पख्तुनख्वा प्रान्तको राजधानी पेशावरमा भएको विस्फोटको तत्काल कुनै समूहले जिम्मेवारी लिएको छैन। तर इस्लामिक स्टेट र कट्टरपन्थी आतंकवादी समूहले विगतमा शिया समुदायमा भएका घातक हमलाहरूको जिम्मेवारी लिएका छन्।
लेडी रिडिङ अस्पताल (एलएचआर)का मिडिया म्यानेजर असिम खानले विस्फोटमा कम्तीमा ५७ जनाको मृत्यु भएको र १९४ जना घाइते भएको पुष्टि गरेका छन् ।
खैबर पख्तुनख्वा सरकारका प्रवक्ता ब्यारिस्टर मोहम्मद अली सैफले विस्फोट आत्मघाती हमला भएको र यस आक्रमणमा दुई आतंककारी संलग्न रहेको बताए।
पेशावरका वरिष्ठ प्रहरी उपरीक्षक (अपरेसन) हारुन रसिद खानले सञ्चारकर्मीसँग कुरा गर्दै आत्मघाती हमलाकारीले आफूलाई विस्फोट गराएको बताए। उनका अनुसार त्यहाँ दुईजना आक्रमणकारी थिए जसमध्ये एकजनाले मात्रै आत्महत्या गरेका थिए ।
एक प्रत्यक्षदर्शीले आत्मघाती हमलाकारीले कालो पहिरन लगाएको र मस्जिदमा प्रवेश गर्ने क्रममा पहिले सुरक्षाकर्मीलाई गोली हाने र त्यसपछि पाँच-छ वटा गोली चलाएको बताए।
प्रत्यक्षदर्शीले जियो न्यूजलाई भने, “यसपछि उनी (मस्जिद) को मुख्य हलमा आए र मिम्बार (इमाम बसेर बयान दिने ठाउँ) अगाडि आफूलाई विस्फोट गराए। त्यसपछि त्यहाँ शव र घाइतेहरू पसेका थिए।"
अस्पतालमा आपतकालीन अवस्था घोषणा गरी बिदामा गएका चिकित्सकलाई ड्युटीमा बोलाइएको छ ।
घाइतेमध्ये केहीको अवस्था चिन्ताजनक रहेको अधिकारीहरुले जनाएका छन् ।
राजधानी पेशावरका एक प्रहरी अधिकारी एजाज अहसानले दुईजना आक्रमणकारीले मस्जिदमा प्रवेश गर्ने प्रयास गरेको र त्यहाँ तैनाथ प्रहरीमाथि गोली चलाएको बताए ।
यस क्रममा एक प्रहरीको मृत्यु भएको छ भने अर्का एकजना गम्भीर घाइते भएको उनले बताए । गोलीबारीपछि विष्फोट भएको अहसानले बताए ।
विस्फोटको निन्दा गर्दै राष्ट्रपति आरिफ अल्वीले ज्यान गुमाउनेप्रति दुःख व्यक्त गरेका छन् ।
प्रधानमन्त्री इमरान खानले पेशावर विष्फोटको कडा निन्दा गरेका छन् भने आन्तरिक मन्त्री शेख रसिद अहमदले प्रान्तका मुख्य सचिव र प्रहरी महानिरीक्षक (आईजी)सँग घटनाको रिपोर्ट मागेका छन्।
विस्फोटको निन्दा गर्दै खैबर पख्तुनख्वाका मुख्यमन्त्री महमूद खानले यस जघन्य कार्यका दोषीहरूलाई न्यायको कठघरामा ल्याउने वाचा गरेका छन्।
उनले धार्मिक स्थलमा मानिसलाई निशाना बनाउनु अमानवीय र क्रूर कार्य भएको बताए । उनले घाइतेहरुको उचित उपचारको व्यवस्था गर्न अधिकारीहरुलाई निर्देशन दिए ।
अफगानिस्तानसँग सीमा जोडिएको प्रान्तको सुरक्षा अवस्थाको समीक्षा गर्न उनले आफ्नो सरकारी निवासमा आकस्मिक बैठक बोलाएका हुन् ।
पीएमएल-एन प्रमुख र राष्ट्रिय सभामा विपक्षी नेता शाहबाज शरीफले ट्वीट गरे, "पेशावरमा एउटा दुखद आतंकवादी घटना भएको छ जसमा धेरै बहुमूल्य जीवनहरू गुमेका छन्। यस क्रूरताको निन्दा गर्न शब्दहरू अपर्याप्त छन्।"
“आतंकवाद हाम्रो सबैभन्दा ठूलो राष्ट्रिय चुनौती बनेको छ। शोकसन्तप्त परिवारजनमा समवेदना।"
